Вандроўка (0+)

27 сакавіка а 17-й гадзіне ў Мастацкім музеі адбудзецца адкрыццё персанальнай выставы Юрыя Платонава “Вандроўка”. У сваіх творах Юрый Платонаў перадае ўсю разнастайнасць рэальнасці вакол нас, узнаўляе адчуванне ад убачанага, дапаўняючы свет яркімі адценнямі і тонамі.

Функцыянальнай асновай твораў мастака становіцца колеравая гармонія, а зачаравальны каларыт і імклівая дынаміка робяць палотны аўтара эфектнымі і запамінальнымі.

Значнае месца ў творчасці гомельскага мастака займае праца на пленэры. У жывым судотыку з наваколлем нараджаецца той стан, які дазваляе надаваць яго творам акрамя выяўленчай эстэтыкі і яскравай візуальнасці асаблівую энергетыку, своеасаблівы “нерв”, экспрэсіўнасць.

У сваіх пейзажах мастак “уключае” гледача ў працэс судотыку са светам вакол нас, акцэнтуючы ўвагу не на стане прыроды, а на стане чалавека. У экспазіцыі будзе прадстаўлена каля 20 жываісных палотнаў, створаных мастаком за апошнія гады.

“Вандроўка” Юрыя Платонава – гэта і ёсць яго жыццярадаснае творчае падарожжа, якое напоўнена святлом і колерам і ўзвышае над штодзённасцю.

Музей працуе: 11:00 – 19:00.